SAN AGUSTIN, Romblon – Kapwa sugatan ang dalawang lalaki na nagtagaan nitong 1:30 ng hapon ng Martes, Setyembre 14, sa Barangay Cagboaya, San Agustin, Romblon.
Ang biktima ay nakilala na si Baldomero Fadriquela Reloj, 61 taong gulang, may-asawa, magsasaka habang ang suspek ay napag-alaman na si Jummy Manipol Fines, 50, walang asawa, magsasaka at parehong residente ng Barangay Cagboaya, San Agustin, Romblon.
Sa imbestigasyon ng San Agustin Municipal Police Station, napag-alaman na magkasama ang biktima at suspek na nag-iinuman ng alak sa loob ng bahay ng biktima kung saan ay nagkaroon ng mainit na diskusyon ang dalawa na humantong sa pagbunot ng suspek ng gulok at tinaga ang biktima na tinamaan sa kaliwang bahagi ng kamay. Gumanti naman ang biktima na pagkatapos mabunot ang kanyang gulok ay tinaga rin ang suspek na tinamaan kanang bahagi ng kamay.
Kapwa naman dinala sa Tablas Island District Hospital ang suspek at biktima ng mga nagreposding mga tauhan ng San Agustin MPS.
Hindi na narekober sa dalawa ang kanilang mga ginamit na armas.
Kasalukuyang nasa kustodiya ng San Agustin MPS ang suspek at inihahanda ang kasong isasampa sa Prosecutor’s Office laban sa nasabing suspek.
